Home / تضمين کيفيت / اعتبار اخيستنه / ځان ارزونه / د ځان ارزونې معيارونه

د ځان ارزونې معيارونه

ځان ارزونه

ځان ارزونه: د لوړو زده کړو وزارت د اعتبار ورکوونې پروسې یوه برخه ده چې یوه تحصیلي مؤسسه یې د یاد وزارت د مسلکي کتونکو ټیم ته د ارزیابۍ او اعتبار ورکونې په منظور د راپور په شکل وړاندې کوي.

هدف یې: د پوهنتون اداره له پوهنځيو، علمي او اداري پروگرامونو، زېربناوو او لاسته راوړنو څخه خپله ارزونه په دې موخه ترسره کوي،  ترڅو د لوړو زده کړو وزارت له لوري د کیفیت د تضمین او  لوړونې  ټاکل شوي معيارونه پوره او اعتبار ترلاسه کړي.

د ځان ارزونې پروسې پایلې

د یادې پروسې په پایله کې تحصیلي مؤسسه کولای شي چې:

۱ – پرېکړه وکړي چې د اعتبار ورکوونې پروسې لپاره ټاکل شويو معیارونو ته نمرې ورکړي.

۲ – ورکول شويو نمرو ته توضیحات ورکړي.

۳ – داسې اسناد او شواهد وړاندې کړي چې د معیارونو توضیحات او څرګندونې تاییدې کړي.

۴ – په راپور کې باید داسې کاري پلان وړاندې شي چې د اصلاح وړ برخې سمون روښانه کړي.

۵ –  په پای کې دا ټول موارد د ځان ارزونې په راپور کې ثبت کړي.

د ځان ارزونې معيارونه

۱ ۰ ماموریت او کړنلاره

د پوهنتون اداره واضح او روښانه کړنلاره او ماموریت لري چې یاده کړنلاره او ماموریت ټولو هېوادوالو ته د ادارې راتلونکو پلانونو او پرېکړو په اړه تفصیلي معلومات روښانوي.

۱.۱. ماموریت (Mission):

د پوهنتون، پوهنځيو او څانگو ادارې د ماموریت لرونکي دي چې د لوړو زده کړو وزارت له خوا منل شوی او ټولو هېوادوالو ته د لاسرسي وړ دی. د دې ترڅنگ پوهنځي او څانگې خپل ځانگړی ماموریت لري چې د پوهنتون او پوهنځي د علمي شوراگانو په وسیله تایید شوی.

۲.۱. ستراتېژیک پلان:

د پوهنتون ادارې د کړنلارې په ترکیب کې ټولې مهمې بوختې خواوې (Stakeholders)، محصلان او کارکوونکي د پنځه کلن ستراتېژیک پلان په جوړښت او پرمختگ کې ونډه لري. یاد ستراتېژیک پلان د لوړو زده کړو وزارت له خوا تایید شوی. د دې تر څنگ، پوهنځي او څانگې خپلې ځانگړې موخې لري چې د پوهنتون او پوهنځي د علمي شوراگانو په وسیله تاییدې شوې دي.

۳.۱. کاري پلان:

د پوهنتون ادارې کلنی کاري پلان ترتیب کړی چې د یاد پلان له مخې به د پنځه کلن ستراتېژیک پلان موخې لاسته راوړي. سربېره پر دې، پوهنځي او څانگې هم خپل کلني پلانونه لري چې د پوهنتون او د پوهنځيو د رئیسانو له لوري تایید شوي دي.

۴.۱. اداري اغېزمنتیا:

د پوهنتون اداره په دوامداره توگه د خپلو کړنو د پیاوړتیا او اغېزمنتیا لپاره کار کوي. یاده اداره د خپلو کار کوونکو په وسیله ترتیب شوی کلنی کاري پلان ارزوي، ترڅو په راتلونکو کلونو کې د خپل کاري پلان د پلي کېدا لپاره لاره هواره کړي. سربېره پر دې، هر پوهنځی او څانگه خپل کلني کاري پلان باندې بیا کتنه کوي، ترڅو د راتلونکو کلونو لپاره د پلان په پلي کېدا کې مرسته وکړي.

۵.۱. عامه معلومات:

د پوهنتون اداره خپل ماموریت، کړنلارې، پالیسۍ او مدیریت په اړه عوامو ته معلومات په واک کې ورکوي. د یادولو وړ ده، چې پورته ذکر شوي معلومات به د ویب سایټ، رسنیو، او نورو لارو چې لاسرسی ورته امکان لري، بوختو خواوو ته په واک کې ورکوي.

۲. د ټولنې په پرمختگ کې ونډه اخستنه

د پوهنتون اداره په محلي، ملي، او سیمه يیزه کچه د ټولنې په پرمختگ کې فعاله ونډه لري چې دا ټول د پوهنتون ادارې په ستراتېژیکو موخو، تصمیم نیونه او د استادانو او محصلینو په ټولو کړنو کې روښانه شوي دي.

۱.۲. ماموریت او ستراتېژیک پلان:

د پوهنتون، پوهنځيو او څانگو ادارې په ټولنیز، اقتصادي او کلتوري پرمختگ کې مهم رول لوبوي. یاده چاره د ادارو د ماموریت او ستراتېژیک پلان په موخو کې د ټولنې محلي، ملي اوسیمه يیزه ښېرازي رانغاړي.

۲.۲. علمي کړنې:

د پوهنتون ټول څېړنیز او تدریسي پروگرامونه په ټولنیز، اقتصادي او کلتوري وده کې د پوهنتون ماموریت منعکسوي. د یادې چارې په موخه پوهنتون د پوهنځيو په کچه کلنۍ ارزونې ترسره کوي چې په ټولنه کې په محلي، ملي او سیمه يیزه کچه د ونډې اخيستنې لاسته راوړنې په گوته کوي.

۳.۲. د کارکوونکو ونډه اخيستنه او بوختیا:

ټول استادان او اداري کارکوونکي خپلو دندو کې په محلي، ملي او سیمه يیزه کچه د ټولنې په پرمختگ کې ځانگړې ونډه لري. سربېره پردې، پوهنتون په ټولنه کې د ټولو کارکوونکو د ونډې اخيستنې پروسه ارزوي.

۴.۲. د محصلانو بوختیا:

ټول محصلان د ټولنې په پرمختگ کې د پوهنتون د ونډې اخيستنې له پروگرامونو خبر دي. پوهنتون د کریکولم او د کریکولم مرستندويه کړنو په وسیله غواړي محصلان په مستقیم ډول په محلي، ملي او سيمه ییزه کچه د ټولنې په پرمختگ کې بوخت کړي.

۳.مشرتابه، مدیریت او اداره

د پوهنتون مشرتابه، مدیریت او اداره په پوهنتون کې د ماموریت او ستراتېژیکو اهدافو په لاسته راوړلو پاملرنه او تمرکز کوي.

۱.۳. مشرتابه:

د پوهنتون مشرتابه، د پوهنځیو رئيسان، د پوهنځیو مرستیالان او د څانگو مشران په رسمي وخت کې د خپلو اړوندو اداري او تدریسي چارو ښه پرمخ بېولو ته ژمن دي. د یادونې وړ ده چې د یادو اشخاصو د کړنو پروسه د ارزونې له لارې څارل کېږي.

۲.۳. مدیریت:

د پوهنتون ادارې د خپل ماموریت او ستراتېژۍ د ښه پرمخ بېولو په موخه یو مناسب او غوره اداري جوړښت رامنځته کړی. د نوموړو چارو د لا ښه پر مخ بېولو په غرض د موثرو اداري کمېټو جوړښت رامنځته کړی، ترڅو کارکوونکو ته خپل مسؤلیتونه واضح او په گوته کړي.

۳.۳. اداره:

د پوهنتون اداره پخپل ماموریت او ستراتېژیک پلان کې پر کاري لومړیتوبونو تمرکز کوي او په دې چاره کې استادان او اړوندې ادارې پوهوي، ترڅو خپل اداري مسؤلیتونه په ښه توگه ترسره کړي.

۴.۳. اداري اخلاق:

د پوهنتون اداره تل هڅه کوي چې د اداري فساد، تبعیض او خپل سرۍ مخه ونیسي، ترڅو شفافیت، مساوات او عدالت د کړنو په ټولو خواوو کې رامنځته کړي. پوهنتون اداره د یادې چارې لپاره رسمي پروسې لري چې محصلان او ټول اداري کار کوونکي په اخلاقي سلوک پوه او د سرغړونې په صورت کې یې له پایلو څخه خبر کړي.

۴. د مالي سرچینو مدیریت

د پوهنتون مالي سرچینې د ماموریت او ستراتېژیک پلان د موخو د لاسته راوړلو په غرض ځانگړې او ښې اداره شوې دي.

۱.۴. مالي پلان جوړونه:

د پوهنتون اداره باوري ده، چې مالي پلانونه یې د ستراتېژیکو اهدافو پر لاسته راوړلو تمرکز کوي. علاوه پر دې، د پوهنتون اداره پنځه کلن مالي پلان لري چې په روښانه توگه د ستراتېژیکو موخو د لاسته راوړلو لپاره په ستراتېژیک پلان کې شامل دی. پر همدې اساس، د پوهنتون اداري معاون د یادې ادارې ټول معاونین او د پوهنځيو رئیسان د پوهنتون د پنځه کلن مالي پلان په ترتیبولو او پرمخ بېولو کې شاملوي.

۲.۴. مالي اداره:

د پوهنتون اداره تضمینوي چې کلنۍ مالي بودیجه په موثره توگه اداره شوې ده.همدارنگه، د پوهنتون ادارې چارو مرستیال د بودیجې کلنی پلان د پوهنځیو له رئیسانو، د څانگو مشرانو، او بوختو خواوو سره په گډه ترتیبوي او په ربعوار ډول یې راپور د پوهنتون علمي شورا ته ارائه کوي.

۳.۴. مالي سیسټم:

د پوهنتون ادارې په پوهنتون کې اغېزمن مالي مدیریت او د حساب ورکونې سیستم رامنځته کړی. پوهنتون حسابي چارو د ترسراوي په موخه د مالي مدیریت ډېټابېس او سافټوېیر پواسطه خپل حسابونه اداره کوي.

۴.۴. حساب ورکوونه:

پوهنتون په کلني ډول د خپلو عوایدو او مصارفو حساب ورکوي. د پوهنتون په اداره کې د حساب ورکوونې په موخه په ملي او سیمه يیزه کچه د تېرو درېیو کلونو مالي راپورونه موجود دي. همدارنگه، د پوهنتون اداره د حساب ورکوونې راپورونه په مالي مدیریت کې د پرمختگ په موخه کاروي.

۵.۴. د عوايدو لاسته راوړلو لارې چارې:

پوهنتون پر داسې یو ترکیب (مېکانېزم) باندې کار کوي چې د وړو کاروبارونو او خدماتو پر بنیاد عوايد لاسته راوړي. پوهنتون پخپل ستراتېژیک پلان کې د کوچنیو کاروبارونو د پرمختگ پلان ځای پر ځای کړی او د عملي کېدو په موخه یې لارې چارې په پام کې نیولي دي.

۵. علمي پروگرامونه

علمي پروگرامونه د پوهنتون د ماموریت (Mission) یوه مهمه برخه تشکیلوي او د دايمي غوره والي په موخه په دوامداره توگه تر بیا کتنې لاندې نیول کېږي.

۱.۵. له ماموریت سره په لیکه کې لا همغږي:

ټول علمي پروگرامونه د پوهنتون ماموریت (Mission) د ښه توگه پرمخ بېولو په موخه همغږي دي. هر علمي پروگرام په روښانه توگه، د ماموریت د ښه شکل ترسره کولو په موخه، خپله ځانگړې کړنه ترسره کوي. پوهنتون د یو داسې ميکانېزم لرونکی دی چې د پوهنتون د ماموریت پر اساس د علمي پروگرامونو څرنگوالی څاري.

۲.۵. د اړتیا وړ روڼوالی:

د لېسانس، ماسټرۍ او دوکتورا تحصیلي دورو علمي پروگرامونه په روښانه توگه، د فراغت اړتیاوې تعریفوي. د ټولو پروگرامونو ځانگړتیاوې په روښانه توگه د کریډیټ سیسټم راپېژني او راښایي چې د فارغانو لپاره کومې درجې لاسته راوړل لازمي دي. سربېره پر دې، د علمي پروگرام ټولې ځانگړتیاوې راښایي چې په کوم شکل پوهه او مهارتونه د پروگرام په هره مرحله کې پیاوړي کېږي او دا هم را په گوته کوي چې کوم مهارتونه به د لا زیاتو څېړنو او زده کړو په واسطه غښتلي شي.

۵.۳. د کلني پروگرام څارنه:

ټول علمي پروگرامونه په کلني ډول د لوړو زده کړو وزارت د کتنې او بیا کتنې پروسې پر مټ څارل کېږي. یاد پروگرامونه په کلني ډول د وزارت د تایید شوي چېک لېست (Checklist) په واسطه چې پکې د محصلانو معلومات او نظرونه شامل دي، ارزول کېږي، ترڅو د پروگرام روان بهیر او چارچلند وڅاري. د نوموړې څارنې په لړ کې ټول هغه اړخونه چې د یو علمي پروگرام د پلي کولو مسؤلیت پر غاړه لري، د شواهدو پر اساس د پروگرام د ښه شکل عملي کېدو په اړه معلومات ارائه کوي.

۴.۵. د پروگرام بیا کتنه:

د علمي پروگرام دوسیه او کریکولم په هرو پنځو کلنو کې د لوړو زده کړو وزارت د رسمي کتنې او بیا کتنې پروسې له خوا تر بیا کتنې لاندې نيول کېږي. پوهنتون د پروگرامونو د بیا کتنې لپاره د لوړو زده کړو وزارت د پروگرامونو له مهالنۍ بیاکتنې څخه گټه پورته کوي، ترڅو د ټولو علمي پروگرامونو د کریکولم بیاکتنه وکړي او یقیني کړي چې ټول علمي پروگرامونه په هر لحاظ د پنځو کلونو لپاره مناسب، منلي او گټور دي. له دې سره په څنگ کې پوهنتون د مهالنۍ بیا کتنې په نتیجه کې ستراتېژیک تصمیمونه نیسي چې د علمي پروگرامونو موثریت د راتلونکو پنځو کلونو لپاره یقیني کړي.

۵.۵. د روزنې زده کړه (Pedagogy):

علمي پروگرامونو د روزنې په موخه د روزنې له بېلابېلو مېتودونو څخه گټه اخيستل کېږي. د محصلانو د زده کړې د چټکتیا لپاره تل هڅه شوې چې په روزنیزو مېتودونو کې نوی والی راشي. د ټولو علمي پروگرامونو پر مخ بیونکي هڅه کوي چې په دوامداره توگه په روزنیز بهیر کې غوره والی رامنځته کړي چې په ټولگیو کې له مناسبې ټکنالوژۍ څخه گټه پورته کول پکې شامل دي. همدارنگه، د علمي پروگرامونو پر مخ بېولو ټیم له شاگرد محورۍ زده کړې څخه په خپلو ټولگیو کې گټه پورته کوي.

۶.۵. ارزونه:

په علمي پروگرامونو کې د انصاف او روڼوالي په موخه په دوامداره توگه له پرمختللو مېتودونو څخه کار اخيستل کېږي. د ټولو علمي پروگرامونو د ځانگړتیاوو پر اساس روښانه کېږي چې د هر علمي پروگرام ارزونه څنگه ترسره شي، ترڅو په گوته شي چې زده کوونکو څومره زده کړه او مهارتونه تر لاسه کړي دي. همدارنگه، د علمي پروگرامونو پلي کوونکی ټیم د وخت په اوږدو کې له خپلو تجربو گټه پورته کوي، ترڅو محصلانو ته تعمیري نظرونه او فیډ بېک (feedback) ورکړي.

۷.۵. برېښنایي زده کړېE-learning:

پوهنتون د برېښنایي زده کړو د پلي کولو په موخه کافي اندازه کار ترسره کړی. پوهنتون د برېښنایي زده کړو پیاوړتیا لپاره په خپل ستراتېژیک پلان کې ځانگړې ستراتېژي ځای پر ځای کړې او د پلي کولو لپاره یې کار پېل کړی دی. سربېره پر دې، پوهنتون په فعاله توگه برېښنایي زده کړې تهیه کوي او ځانگړی مېکانېزم یې ورته چمتو کړی، ترڅو زده کوونکي ترې گټه پورته کړي.

۸.۵. د مرستې توامیتونه:

د پوهنتون اداره په هېواد او له هېواد څخه بهر توامیتونو ته وده ورکوي. پوهنتون په موثره توگه په هېواد کې دننه او په نړیواله کچه له لوړو زده کړو موسسو سره توامیتونه اداره کوي، ترڅو خپلو ستراتېژیکو موخو ته ورسېږي. د دې ترڅنگ، پوهنتون په خپل ستراتيژیک پلان کې د نړیوالو توامیتونو د پیاوړتیا پلان ترتیب کړی چې په لور یې کوټلي گامونه اخيستي دي.

۶. څېړنه

د پوهنتون اداره د څېړنېزو کړنو لپاره د پرمختگ پلانونه لري، ترڅو ډاډمن شي چې د پوهنځيو ټول استادان په څېړنیزو کړنو بوخت دي.

۱.۶. ستراتېژي او پلان:

د پوهنتون په ستراتېژیک پلان کې د څیړنې فعالیتونه شامل دي. د پوهنتون اداره د پوهنځیو په سطحه د څیړنې پروژې حمایه کوي. همدارنگه، د پوهنتون اداره د څیړنې په برخه کې ښکاره موخې لري او د لوړو زده کړو وزارت له اصولو سره سم د څېړنې په مهمو پروژو کې ونډه لري.

۲.۶ کلتور او غوښتنې:

د پوهنتون ټول استادان د څېړنې په ټولو قوانینو پوهېږي. همدارنگه ټول استادان د څېړنې په اړه فعالیتونه او مهارتونه په خپلو انفرادي عملیاتي پلانونو کې ځای پر ځای کړي دي. سربېره پر دې، د څېړنې اړوند ټول فعالیتونه د ارزونې له لارې څارل کېږي.

۳.۶. له څېړنې څارنه:

د پوهنتون اداره د محصلانو د څېړنیزو پروژو د څارنې په موخه ظرفیت جوړونه کړې ده. په دې لړ کې پوهنتون د څېړنې په برخه کې د استادانو ظرفیت لوړولو په موخه پلانونه جوړ کړي دي. همدارنگه، د پوهنتون اداره د یو رسمي چوکاټ په شتون کې د محصلانو له لوري د څېړنيزو پروژو له ترسره کولو څخه ملاتړ کوي.

۴.۶. مرسته

د پوهنتون اداره د څېړنیزو پروژو د مرستو لپاره پر ظرفیت جوړونې کار کړی دی. همدارنگه، د پوهنځیو په سطحه د څېړنې کمېټې چې د پلان جوړونې مسوولیت په غاړه لري، شتون لري. په ټوله کې د پوهنتون ادارې د څېړنې په موخه یوه اداره، چې د پوهنتون په سطحه د څېړنې ټولې کړنې څاري او له یادو پروژو سره لازمې مرستې کوي، رامنځته کړې ده.

۵.۶. روزنه:

د پوهنتون اداره د څېړنې د مهارتونو د لوړونې په برخه کې کار کړی. په دې لړ کې پوهنتون هڅه کړې چې په پوهنتوني او یا هم ملي کچه د روزنې پروگرامونه ترلاس لاندې ونیسي، ترڅو د څېړنې په برخه کې روزل شوي استادان په پوهنتون کې ولري. د دې تر څنگ، پوهنتون د پوهنځیو په سطحه د څېړنې په برخه کې د روزنې پروگرامونه په کار اچولي، ترڅو په یاده برخه کې د استادانو وړتیاوې لوړې کړي.

۷. استادان او کارکوونکي

پوهنتون خپل استادان او اداري کارکوونکي په دندو گماري، وده ورکوي او اداره کوي یې، ترڅو خپل ماموریت او ستراتېژیکې موخې ترلاسه کول باوري کړي.

۱.۷. علمي وړتیا:

پوهنتون د اړو وړتیاوو په نظر کې نیولو سره استادان په دندو گماري، ترڅو علمي پروگرامونه په غوره توگه محصلانو ته وړاندې کړي. د پوهنتون اداره ډاډه ده چې د داسې وړتیاوو لرونکي استادان یې په دندو گمارلي چې د یادو علمي او اکاډيمیکو پروگرامونو په پرمخ بېولو پوره برلاسي دي. سربېره پر دې، پوهنتون د روزنیز پلان له مخې په پام کې لري، چې د راتلونکي لپاره هم د استادانو پر دندو گمارل به یې راتلونکی ښوونیز بهیر لا هم پیاوړی کړي.

۲.۷. اداري وړتیا:

پوهنتون د اړو وړتیاوو په نظر کې نیولو سره اداري کار کوونکي په دندو گماري، ترڅو اداري چارې په مناسبو مهارتونو سره پر مخ بوځي. پوهنتون اداره ډاډه ده چې د داسې وړتیاوو لرونکي اداري کارکوونکي یې په دندو گمارلي، چې د یادو اداري چارو په پرمخ بېولو پوره برلاسي دي.سربېره پر دې، پوهنتون د اداري پلان له مخې په پام کې لري، چې د راتلونکي لپاره هم د اداري کارکوونکو پر دندو گمارل به یې راتلونکی اداري بهیر لا هم پیاوړی کړي.

۳.۷. د گمارنې تگلارې او پروسې:

د استخدام ټولې تگلارې او پروسې، کاري وېش او د کارکوونکو ارتقاء د وړتیاوو پر اساس او رڼې دي. پوهنتون اداره ډاډه ده چې اداري کارکوونکي یې په گټوره بڼه پر دندو گمارلي او ځای پر ځای کړي، چې د یادو اداري چارو په پرمخ بېولو پوره برلاسي دي. پوهنتون د خپلو اداري کار کوونکو پر وړاندې روښانې تگلارې او پروسې لري چې ټول کار کوونکي ورته تل لاسرسی لري. د دې ترڅنگ، پوهنتون د اداري کارکوونکو د کړنو د ثبتولو لپاره ځانگړي سیستمونه لري، چې د یادوسیستمونو پر مټ د تگلارې او پروسې په ښه ډول عملي کول او تعقیبول، یقیني کوي.

۴.۷. د کړنو بیا کتنه استادان:

د ټولو استادانو کړنې په کلني ډول بیا کتل کېږي. نوموړې بیا کتنه یې د کاري کیفیت لوړونې په موخه ترسره کېږي. پوهنتون د ټولو استادانو د کړنو د بیا کتنې په موخه د کړنو د بیا کتنې پروسه رامنځته کړې چې د محصلانو د نظرونو په واسطه استادان خپلو هغو ټکو ته متوجه کړي چې لا پیاوړتیا ته اړتیا لري. سربېره پر دې، پوهنتون د ټولو استادانو د کړنو د بیا کتنې لپاره درسي کتنه ترسره کوي، ترڅو یقیني کړي چې ټول استادان پخپل انفرادي کاري پلان کې د پرمختگ یو غوره پلان له ځانه سره لري.

۵.۷. د کړنو بیا کتنه اداري کارکوونکي:

د ټولو اداري کارکوونکو کړنې په کلني ډول بیا کتل کېږي. نوموړې بیا کتنه یې د کار کیفیت لوړونې په موخه ترسره کېږي. پوهنتون د ټولو اداري کارکوونکو د کړنو بیا کتنې په موخه د کړنو د بیا کتنې پروسه رامنځته کړې چې کاري فیډبک یې هغو ټکو ته پاملرنه جلبوي چې لا پیاوړتیا ته اړتیا لري. سربېره پر دې، پوهنتون د ټولو اداري کارکوونکو له کړنو څخه بیا کتنه ترسره کوي، ترڅو یقیني کړي چې ټول اداري کارکوونکي پخپل انفرادي کاري پلان کې د پرمختگ یو غوره پلان له ځانه سره لري.

۷.۶. مسلکي وده:

پوهنتون تل د ټولو علمي او اداري کارکوونکو وده او انکشاف په نظر کې نیولي او مرسته ورسره کوي. پوهنتون د روزنیزو پروگرامونو پروسه رامنځته کړې او د پوهنتون په کچه د ټولو علمي او اداري کارکوونکو لپاره د مسلکي ودې پلان لري. همدارنگه، پوهنتون د مسلکې ودې مشر ټاکلی چې د مسلکي ودې ټولو برخو اداره یې کاري مسؤلیت دی.

۷.۷.اکاډمیکه خپلواکي:

علمي او اکاډمیکه خپلواکي د قانون په رڼا کې حمایه او ترې ساتنه کېږي. پوهنتون باوري کوي چې ټول علمي او اداري کارکوونکي او محصلان د اکاډمیکې خپلواکۍ له هغو اصولو څخه خبر دي چې د لوړو زده کړو وزارت په قانون کې ځای پر ځای شوي. د دې تر څنگ، پوهنتون د څارنې یو ځانگړی مېکانیزم لري، ترڅو باوري کړي چې د لوړو زده کړو وزارت د قانون په رڼا کې اکاډمیکه خپلواکي په بشپړه توگه رعایت شوې ده.

۸.۷. د شکایاتو، ځورونو او انتظامیه پروسو کړنلارې:

پوهنتون په موثره توگه شکایات، ځورونې او د ډسپلین اړوند مسايل اداره کوي. پوهنتون داسې کړنلارې رامنځته کړي چې د ټول علمي او اداري کارکوونکو شکایات، او ډسپلین اړوند مسايل د لوړو زده کړو وزارت د قانون په رڼا کې اداره کوي. سربېره پر دې، پوهنتون د نوموړې پروسې د څارنې او پلي کېدنې په موخه خپلې تگلارې تر بیا کتنې لاندې نیسي او نوی والي پکې رامنځته کوي.

۸. د محصلانو تجربې

د پوهنتون اداره په دې باور ده چې د محصلانو د زده کړو او پرمختگ په موخه یې مناسب چاپېریال رامنځته کړی دی.

۱.۸. د محصلانو په اړه معلومات:

پوهنتون د محصلانو په اړه معلوماتو راټولولو او تجزیه کولو لپاره ځانگړي سیستمونه لري. د محصلانو د داخلې، جذب، جریان او لاسرسي ټول معلومات راټولېږي او د راتلونکي لپاره پلان جوړونې په موخه ارزول کېږي. د دې تر څنگ، پوهنتون د پلان جوړونې ادارې رامنځته کړي او د پلان جوړونې مشر یې ورته گمارلی چې معلومات راټول او تجزیه کړي او له محصلانو څخه د راټولو شویو موادو پر اساس راتلونکې پلان جوړونه ترسره کړي.

۲.۸. د محصلانو پایله (Feedback)اخیستل:

پوهنتون د محصلانو فیډ بېک راټولولو لپاره ځانگړې پروسې او پړاونه لري، ترڅو پر مټ یې هغه ساحې چې ودې او پیاوړتیا ته اړتیا لري، پیاوړې کړي. پوهنتون په دومداره توگه له محصلانو او د محصلانو له استازو سره د سروې او نورو مېتودونو له لارې مشورې ترسره کوي، ترڅو د هغوی له تجاربو او اړتیاوو څخه ځان خبر کړي. سربېره پر دې، پوهنتون د محصلانو نماینده گان په مناسبو کمېټو، پروسو او مېکانیزمونو کې بوخت کړي، ترڅو محصلانو ته د پوهنتون د کړنو په اړه معلومات ارایه کړي.

۳.۸. د فارغانو مهارتونه:

پوهنتون ټول مهارتونه تعریف کړي او هغو مهارتونو ته یې وده ورکړې چې له فارغانو سره په کاري ساحه کې مرسته کوي او د ښېرازۍ سبب یې گرځي. پوهنتون له استخداموونکو ادارو سره ناستې ترسره کړي، ترڅو هغه مهارتونه په گوته کړي چې د فارغانو په کاري ساحه کې د بریالیتوب عامل گرځي. د دې سره په څنگ کې پوهنتون تل له استخداموونکو ادارو سره ناستې ترسره کوي، ترڅو د محصلانو هغو مهارتونو ته وده ورکړي چې په کاري ساحه کې ورته اړتیا لیدل کېږي.

۴.۸. محصلانو ته اسانتیاوې برابرول او د هغو ملاتړ:

پوهنتون د محصلانو علمي او شخصي اړتیاوو د پوره کولو په موخه اسانتیاوې او مشورتي خدمات برابروي. همدارنگه د محصلانو لپاره د مسلک جوړونې او مسلکي ودې په موخه ځانگړې اسانتیاوې چمتو کوي.

۵.۸. انصاف او برابروالی:

پوهنتون محصلانو لپاره داسې زمینه مساعده کړې چې د جنسي، ټولنیز او فزیکي تبعیض پرته له ټولو محصلانو سره یو شان او مساوي چلند کېږي. د نوموړي کار د ترسره کولو په موخه پوهنتون ځانگړی مېکانیزم ترتیب کړی او ټولو بوختو خواوو ته یې په واک کې ورکړی. همدارنگه، پوهنتون د نوموړي مېکانیزم لپاره یو مشر ټاکلی چې د اړوندو چارو په اړه خپل کلنی راپور د پوهنتون علمي شورا ته وړاندې کوي.

۶.۸. د نظم او ډسپلین پالیسۍ او پروسې:

پوهنتون د محصلانو لپاره د پوهنتون او پوهنځیو په سویه د نظم او ډسپلین پالیسۍ چمتو کړي چې له مخې یې د محصلانو سلوک د ځانگړو کمېټو په واسطه اداره کوي. نوموړې پاليسۍ محصلینو ته په واک کې سپارل شوې دي، چې په چمتو کولو کې یې له محصلانو څخه هم نظرونه اخیستل شوي دي.

۹. د کیفیت تضمین او لوړونه

د پوهنتون اداره داسې یو جوړښت او پروسه په لاره اچولې چې له مخې یې له ټولو ادارو څخه ارزونه ترسره شوې او په دوامداره توگه د هغو د کړنو او د کیفیت د لوړوالی لامل گرځېدلی.

۱.۹. اداره :

د پوهنتون اداره په دې باور ده چې د کیفیت د تضمین او لوړونې کومه پالیسي او پروسه چې د ارزونې چارې پر غاړه لري، د ټول پوهنتون کنټرول او اداره کول په ټولو مرحلو کې اغېزمنه تمامه شوې ده. همدارنگه، د پوهنتون او اړوندو پوهنځیو د کیفیت تضمین کمېټې د کیفیت تضمین او  لوړونې د پروسې د ښه پرمخ بېولو په موخه قوي رهبري او اداره لري. سربېره پر دې د پوهنتون رهبري د کیفیت د تضمین په اداره کولو کې مستقیماً شامله ده چې د کیفیت د تضمین ټولې اړونده چارې د هغوی د هڅو په واسطه په کیفیت کې لاښه والی رامنځته کړي.

۲.۹. سرچینې:

د پوهنتون اداره د پوهنځیو او ټولو اړونده څانگو او استادانو په ملاتړ مسووله ده چې د کیفیت د تضمین او لوړونې په پروسه کې پرمختگ ثابت کړي. د پوهنتون ادارې د څانگو، پوهنځیو او اړوندو نورو ادارو چې د کیفیت تضمین په لوړونې کې کار کوي، دوی سره د مرستې کولو په موخه یوه عمومي کمېټه لري، ترڅو اړوندې چارې په ښه توگه ترسره شي. پوهنتون د یادې کمېټې لپاره یو مسوول کس ټاکلی چې د کیفیت تضمین له ټولو کمېټو د پالیسیو او پروسو څخه څارنه ترسره کړي.

۳.۹. پروسې:

د پوهنتون اداره د کیفیت د تضمین د ښه تطبیق او پرمخ بېولو لپاره له هغو پروسو او کړنلارو گټه پورته کوي، چې د لوړو زده کړو وزارت له خوا ورته استول شوي دي. د پوهنتون د کیفیت د تضمین او لوړونې اداره په دوامداره توگه هڅه کوي چې د کیفیت تضمین د پلي کېدا او پرمختگ پروسې په پوهنتون کې په ښه توگه عملي شي. په پوهنتون کې د کیفیت د تضمین او لوړونې ادارې مشر د ټولو کمېټو، پوهنځیو او څانگو په سطحه په موثره توگه معلومات راټولوي او راپور پرې چمتو کوي، ترڅو ثابت کړي چې په پوهنتون کې د کیفیت تضمین ټولې چارې په خورا غوره توگه عملي شوې دي.

۴.۹. کلتور:

د پوهنتون اداره په دې باور ده چې ټولې علمي او اداري چارې د هغو اړینو او ضروري موادو پر مټ چې د کیفیت تضمین  د لوړونې او پرمختگ سبب گرځي، پر مخ بیایي. علاوه پردې د پوهنتون د کیفیت د تضمین او لوړونې اداره د اړینې روزنې عامه پوهاوي پروگرامونه د ټولو اداري کارکوونکو په واک کې ورکوي، ترڅو ټول اداري کارکوونکي یو له بل سره د کیفیت د تضمین او لوړونې لپاره اړیکې ولري. له دې پرته د ټولو علمي او اداري کارکوونکو په انفرادي کاري پلانونو کې د کیفیت تضمین او  لوړونې د اهدافو په اړه مسایل رانغښتل شوي دي.

۱۰. کتابتون او معلوماتي سرچینې

د پوهنتون اداره په دې باور ده چې د کتابتون او معلوماتي سرچینو په اړه محصلانو ته کافي معلومات په واک کې ورکړل شوي دي.

۱.۱۰. ظرفیت:

د پوهنتون اداره د کتابتون او د معلوماتو موثرې بېلگې برابروي، ترڅو محصلان ترې په خپلو څېړنیزو اوعلمي پروگرامونو کې گټه پورته کړي. د پوهنتون اداره د وړو او تجربه لرونکو مامورینو په درلودلو سره په پوهنتون کې د کتابتون او معلوماتي سرچینو اسانتیاوې رامنځ ته کړې دي. سربېره پر دې، د پوهنتون اداره په پوهنتون کې د معلوماتي سرچینو او کتابتون د پرمختگ لپاره په خپل ستراتېژیک پلان کې پرمختیایي پلان لري.

۲.۱۰. اداره:

په اداره کې کتابتون او معلوماتي سرچینې په موثره توگه مدیریت شوي دي، ترڅو د علمي او اداري موخو د لاسته راوړلو په برخه کې گټور ثابت شي. همدارنگه، پوهنتون د کتابتون او معلوماتي سرچینو په برخه کې یو مسوول کس ټاکلی، ترڅو دا باوري کړي چې د دولتي او اداري سرچینو د شته اصولو په رڼا کې د کتابتون او معلوماتي سرچینو چارې په اغېزمنه توگه پرمخ یوسي. سربېره پر دې، پوهنتون د کتابتون د ښه تجهیز په موخه د پوهنځیو او کتابتون ترمنځ همغږي رامنځنه کړې، ترڅو د کتابتون چارې په اغېزمنه توگه پرمخ ولاړې شي.

۳.۱۰. لاسرسی:

پوهنتون په دې باوري دی چې ټول استادان او محصلان کتابتون ته لاسرسی لري او کتابتون کم تر کمه په اونۍ کې شپږ ورځې هره ورځ د لسو ساعتونو لپاره د استادانو، کارکوونکو او محصلانو پر مخ پرانستی دی. له دې نه علاوه، د پوهنتون اداره پرلیکه (Online) سرچینو ته د لاسرسي د پرمختگ پلان لري.

۴.۱۰. روزنه:

دمحصلانو او ټولو اداري کارکوونکو لپاره د روزنې پروگرامونه موجود دي، ترڅو خپلې وړتیاوې د کتابتون او معلوماتي سرچینو په اړه زیاتې کړي. همدارنگه، د پوهنتون ادارې د ټولو کارکوونکو او محصلانو د روزنې لپاره موقع په لاس کې لري، ترڅو د کتابتون او معلوماتي سرچینو په غوره استعمال یې پوه کړي او هم اداره د هغوی د پرمختگ لپاره اړین روزنیز ورکشاپونه د کریکولم د اړتیاوو په رڼا کې په کار اچوي.

۱۱. روزنه، معلوماتي ټيکنالوژي او د بدني روزنې اسانتیاوې

د معلوماتي ټيکنالوژۍ په برخه کې د پوهنتون اداره کافي زېربناوې لري، چې د پوهنتون د ستراتېژیکو موخو په لاسته راوړلو کې یې اسانتياوې برابرې کړې دي.

۱.۱۱. روزنیزې اسانتیاوې:

اداره د موثرې نظري او عملي روزنې او څیړنې اسانتیاوې د محصلانو د ضرورتونو پر اساس برابرې کړې دي، ترڅو په غوره توگه د محصلانو روزنیز پروگرامونه پرمخ یوسي. سربېره پردې، اداره د خپل ستراتېژیک پلان په رڼا کې د روزنې د پرمختگ پلان لري.

۲.۱۱. معلوماتي ټېکنالوژي:

د پوهنتون ادارې هڅه کړې، ترڅو د استادانو او محصلانو لپاره له وخت سره سم د موثرې او اغېزمنې معلوماتي ټېکنالوژۍ زېربناوې رامنځ ته کړي. د دې تر څنگ، د پوهنتون ادارې د غوره معلوماتي ټېکنالوژۍ امریت ایجاد کړی، ترڅو د ټولو اداري کارکوونکو لپاره د معلوماتي ټېکنالوژۍ په برخه کې اسانتیاوې رامنځ ته کړي.

۳.۱۱. د لیلیې او بدني روزنې اسانتیاوې:

د پوهنتون اداره د لیلیې (په خاصه توگه د اناثو د لیلیې) او بدني روزنې په برخو کې لازمې اسانتیاوې رامنځ ته کړې دي. د دې ترڅنگ د پوهنتون ادارې په یاده چاره کې د لا ښه پرمختگ او اسانتیاوو په موخه د بدني روزنې امریت جوړ کړی دی.

۴.۱۱. صحت او مصؤنیت:

د پوهنتون چاپېریال د استادانو، اداري کارکوونکو او محصلینو د صحت او ساتنې لپاره مناسب دی. د پوهنتون په ټولو برخو (لابراتوارونو، دوکانونو او عامه ځایونو) کې د صحت او خوندیتوب په موخه وقایوي اسانتیاوې رامنځته کړې دي. سربېره پر دې، د طبيعي او بېړنیو پېښو د پېښېدا په صورت کې اسانتیاوې وجود لري.

۵.۱۱. امنیت:

د پوهنتون چاپېریال د استادانو، اداري کارکوونکو او محصلینو لپاره د امن ځای دی. پوهنتون د ټولو کارکوونکو او محصلینو د امنیت په موخه امنیتي پرسونل پر دندو گمارلي، ترڅو دا باوري کړي چې په پوهنتون کې امنیت خوندي دی. نوموړې امنیتي اداره له پوهنتون څخه د امنیت ساتنې په موخه په دوامداره توگه څارنه ترسره کوي. د دې تر څنگ، نوموړې اداره په راتلونکي کې د امنیتي پېښو د مخنیوي په موخه اغېزمن پلان لري.