Home / تضمين کيفيت / د تضمين کيفيت په اړه

د تضمين کيفيت په اړه

د الفلاح پوهنتون تضمين کيفيت اداره

لکه څرنګه چې پوهنتون یوه مهمه علمي او اکاډيمیکه اداره ده، نو پر دې بنسټ د پوهنتون ټولې برنامې خصوصاً علمي او اکاډيمیکه برخه يې باید د ملي او نړیوالو معیارونو سره برابره وي او هڅه وکړي چې د خپلو علمي خدماتو نوعیت او کیفیت لاپسې غښتلي او معیاري کړي چې دغه مرام او هدف ترلاسه کول د کیفیت، معیار او پالیسۍ پېژندنې او جوړولو متخصص بشري ځواک ته اړتیا لري، تقریباً د نړۍ ټول پرمختللي پوهنتونونه او نورې علمي ادارې او حتی تولیدي ادارې چې د غوره کیفیت او معیاريتوب درجه ېې ترلاسه کړې او په په ټولنه کې پراخه نفوذ لري نور څه نه، بلکې  ځانته ېې ځانګړي معیارونه ټاکلي او د معیارونو د غوره او باکیفیته تطبیق لپاره ېې سټراټیژي او پالیسیانې جوړې کړې چې د همدې پروسې په عملي کولو سره يې د خپلې ادارې نوم ته د یوې لويې معنوي شتمنۍ ارزښت ور په برخه کړی.

له نېکه مرغه په دې ورستیو کې د افغانستان اسلامي جمهوریت د لوړو زده کړو وزارت د دې لپاره چې په ټولو شخصي او دولتي تحصیلي مؤسساتو او پوهنتونونو کې معیار او کیفیت غوره او نړيوال حیثیت خپل کړي، په همدې موخه يې د تضمین کیفیت ریاست رامنځته کړی، چې د همدې ریاست له اصولو او لایحې سره سم باید په ټولو تحصیلي مؤسساتو او پوهنتونونو کې د تضمین کیفیت څانګې او کمیټې وجود ولري.

پر دې اساس الفلاح پوهنتون په خپل تشکیل او جوړښت کې هم د تضمین کیفیت مستقله  څانګه لري، په  یاده څانګه کې د ټولو پوهنځیو  رئيسان او د تضمین کیفیت اداري مسوول چې د پوهنتون په سطحه د تضمین کیفیت عمومي کمېټه تشکیلوي او همدارنګه په هر پوهنځي کې فرعي کمېټې وجود لري، چې مستقیماً د پوهنتون د علمي معاونیت تر چطر لاندې د تضمین کیفیت اړوندې چارې پر مخ وړي، او پخپله برخه کې یې د لوړو زده کړو وزارت د تضمین کیفیت او اعتبار ورکوونې ریاست د ټولو معیارونو، لایحو او پالیسیو په پوهاوي، ترتیب، تطبیق او څارنه کې پوره کار کړی او یاد ریاست ته يې په اړه مستند راپورونه وړاندې کړي دي.