Home / د څوارلسم پاسانو د داخلې شرايط

د څوارلسم پاسانو د داخلې شرايط

په خصوصي پوهنتونونو او د لوړو زده کړو په مؤسسو کې د  ۱۴ ټولګیو د فارغانو د جذب طرزالعمل

څلورمه ماده :

له څوارلسم ټولګیو څخه د فارغانو د جذب طرزالعمل:

هغه کسان چې د تخنیکي او مسلکي انسټیټونو، دارالمعلمینونو، نیمه عالي صحي انستیتونو، دیني مدرسو، او دارالعلومونو له څوارلسم ټولګي څخه فارغ شوي، د لوړو زده کړو وزارت د نافذه کړنلارو په مطابقت په لاندې شرایطو به د لوړو زده کړو په مؤسسو او پوهنتونونو کې شاملېدای شي.

  1. دتابعیبت تذکرې لرل.
  2. د اړوند وزارت په تايید، له څوار لسم ټولګي څخه د فراغت سند لرل.
  3. په اړوند پوهنتون يا خصوصي تحصیلي مؤسسه کې نوم لیکنه او د کانکور کارت ترلاسه کول.
  4. د پوهنتون يا مؤسسې او لوړو زده کړو وزارت د ټولو مقرراتو او ضوابطو د منلو او عملي کولو ژمنه وکړي.
  5. په دیارلسمو او څوارلسمو ټولګیو کې یې باید د نمرو ۸۰ سلنه پوره کړې وي.
  6. د اړوندې تحصیلي مؤسسې يا پوهنتون په کانکور ازموینه کې باید لږترلږه ۶۰٪ نمرې ترلاسه کړي.
  7. داوطلب يوازې په خپله اړونده څانګه کې خپل تحصیل ته دوام ورکولای شي.
  8. د صحي علومو انسټیټونو، تخنیکي او مسلکي انسټیټونو او دارالمعلمینو فارغان چې له ۱۳۸۸هـ ش کال څخه مخکې له نوموړو څانګو څخه فارغان شوي وي، په اختصاصي کانکور کې له بریالیتوب وروسته په یو کال تنزیل سره په دویم کال ( درېیم سمستر) کې شاملېدای شي او دارالعلومونو او دارالمعلمینونو هغه فارغان چې ورسته له ۱۳۸۸ کال څخه له نوموړي انسټیټونو څخه فارغ شوي وي، پرته له تنزیل څخه په درېیم کال ( پنځم سمسټر) کې شاملېږي.

د پورته ذکرشويو شرایطو د درلودونکي داوطلبانو اسناد، د تحصیلي مؤسسې يا پوهنتون له خوا ترتیبېږي او د اختصاصي  کانکور آزموینې څخه یوه اونۍ مخکې د خصوصي لوړوزده کړو مؤسسو يا پوهنتونونو ریاست ته سپارل کیږي.

د دې مادې له شرایطو سره د برابرو داوطلبانو اختصاصي کانکور آزموینه د خصوصي لوړوزده کړو مؤسسو، پوهنتونونو یا د لوړو زده کړو وزارت د باصلاحیته استازي تر ریاست لاندې د خصوصي مؤسسې لخوا اخیستل کېږي.

پنځمه ماده :

د ۱۲ او ۱۴ ټولګیو فارغان نشي کولای چې په یو وخت کې له یوه څخه په زیاتو پوهنځیو او د يو پوهنځي په څو څانګو یا په څو تحصیلي مؤسسو کې زده کړې وکړي. د سرغړونې په صورت کې د نوموړي اسناد د لوړو زده کړو وزارت د لوړو زده کړو مؤسسو د نظارت او ارزونې کمیسيون له خوا باطل اعلانېږي.

شپږمه ماده:

دا طرزالعمل د خصوصي لوړو زده کړو مؤسسو له رئیسانو سره تر مشورې ورسته او د خصوصي لوړو زده کړو مؤسساتو د کميسیون له تايید او د لوړوزده کړو وزارت مقام له منظورۍ څخه وروسته او د خصوصي لوړو زده کړو مؤسسو د کانکور آزموینې د مقررې تر نهایي کېدو پورې نافذ او د اجرا وړ دی.

پوهاند بری صدیقي