Home / څېړنه / مجلې په اړه

مجلې په اړه

الفلاح علمي څېړنيزه کلنۍ مجله

الفلاح علمي څېړنيزه مجله، د الفلاح پوهنتون رسمي علمي مجله ده چې په کال کې يو وار چاپېږي. دغه مجله کې د پوهنتون استادانو انفرادي او ګروپي څېړنې چې په ميداني او کتابتوني څېړنيزو کړنلارو ولاړې وي، تر تاييد او کتنې معلومې پروسې وروسته چاپ ته سپارل کېږي. د الفلاح پوهنتون له استادانو پرته، د نورو پوهنتونونو او څېړنيزو بنسټونو غړي هم کولی شي خپلې څېړنې الفلاح علمي څېړنيزي مجلې ته د چاپ لپاره واستوي.

د چاپ شرايط

الفلاح علمي او څېړنيزه مجله په لاندې شرايطو برابرې علمي څېړنې او علمي مقالې د چاپ لپاره مني:

۱. د څېړنيزې ليکنې يا علمي مقالې موضوع بايد نوې وي او له دې وړاندې بل شخص يا ادارې پرې کار نه وي کړی.

۲. څېړنه په داسې موضوع تر سره شوې وي چې لوستل يې اړين وي، موضوع يې ډېره عامه او پراخه نه وي، يعنې د امکان تر بريده يې موضوع مشخصه وي.

۳. د ليکنې موضوع  او نور متن بايد لوستونکي ته واضحه وي او هيڅ ډول ابهام پکې نه وي.

۴. په علمي ليکنه کې دې ليکوال د يوې موضوع په اړه پرېکړه و نه کړي او دا کار دې لوستونکو ته پرېږدي او په څېړنيزه ليکنه کې دې ليکوال د څېړنې کړنلارې په اساس نتيجې ته ورسېږي.

۵. څېړنيزه ليکنه بايد دغې برخې ولري: موضوع، د ليکوال نوم، اداري يا کاري تړلتيا، لنډيز، کليدي کلمات،

سريزه، د څېړنې کړنلاره، مناقشه (د اړتيا پر اساس)، [نتيجه]/ پايله، وړانديزونه (د اړتيا پر اساس) او مأخذونه.

۶. د تړلو څېړنو/ليکنو د يادونې پر وخت دې له مفهومي اقتباس څخه کار اخستل شوی وي.

۷. مأخذونه بايد د مأخذ ليکنې اوسنيو ارونو په رڼا کې ليکل شوي وي.

۸. په موضوع کې دې ټولې خبرې او نظرونه داسې ليکل شوي وي چې منطقي او علمي تړاو ولري.

۹. ليکنه دې د امکان تربريده لنډه او سکښت يې د يوې علمي مقالې يا څېړنې استازيتوب وکړي.

۱۰. علمي ليکنه بايدلږ تر لږه پنځه او څېړنيزه ليکنه بايد لږ تر لږه لس مأخذونه ولري.

۱۱. د څېړنيزې ليکنې د کلماتو (Words) شمېر بايد د ۳۰۰۰ او ۷۰۰۰ تر منځ وي. همدا شان د علمي مقالې د کلماتو شمېر بايد د ۱۵۰۰ او ۲۵۰۰ ترمنځ وي.

۱۲. الفلاح علمي او څېړنيزه مجله کثير المثالک (multi-disciplinary)مجله ده چې په پښتو او دري ژبو د ټولنيزو علومو، اداري علومو، اقتصاد، ديني علومو او انجنيري اړوند ليکنې د کتنو او چاپ لپاره مني.

۱۳. د موضوع اهميت او زماني قلمرو ته په کتو سره الفلاح علمي او څېړنيزه مجله په ټوله ګڼه کې دوه ژباړې د چاپ لپاره مني.

۱۴. يو ليکوال نه شي کولی چې د مجلې په يوه ګڼه کې دوه ليکنې چاپ ته وسپاري.

۱۵. يواځې هغه څېړنيزي ليکنې/علمي مقالې به د کتنو پړاو ته ځي چې د کتنو لپاره تاييد شي. که چېرې په ليکنه کې له کتنو وروسته د ليکوال له خوا اړين اصلاحات صورت و نه مومي، بيا هم امکان شته چې ليکنه له پروفي کتنې او چاپ څخه پاتې شي.

۱۶. ټولې ليکنې به د لاندې ذکر شوي پروسيجر له مخې کتل کېږي:

الف: د الفلاح پوهنتون استاد له خوا استول شوې څېړنيزه ليکنه/علمي مقاله

۱. د ليکوال له خوا ليکنه په اړوند پوهنځي کې د څېړنې کمېټې مسوول ته د کتنې لپاره سپارل کېږي.

۲. د موضوع تر کره کتنې وروسته ليکوال سره د کتنو نتايج  په کتبي بڼه شريکېږي.

۳. د مجلې کتنپلاوي غړي له خوا ليکنه کتل کېږي او ملاحظات له ليکوال سره شريکېږي.

۴. د څېړنې امريت له خوا موضوع ته کره کتنه کېږي او ملاحظات ليکوال سره شريکېږي.

۵. له ليکوال څخه د ليکنې نهايي او اصلاح شوې بڼې له تر لاسه کېدو او کتنو وروسته د مجلې مدير مسوول ته سپارل کېږي.

۶. د ليکنې پروفي کتنه تر سره کېږي او ليکنه چاپ ته اماده کېږي.

۷. د ټولو ليکنو ډيزاين تر سره کېږي او مجله چاپ ته سپارل کېږي.

ب: د نورو پوهنتونونو ، علمي ادارو او څېړنيزو بسنټونو غړو له خوا استول شوې څېړنيزه ليکنه/علمي مقاله

۱. ليکوال په شرايطو برابره موضوع د arj@alfalahuni.edu.af له لارې د الفلاح علمي او څېړنيزې مجلې ته استوي.

۲. ليکنه له چاپ شرايطو سره پرتله کېږي.

۳. که چېرې ليکنه د مجلې له غوښتنو سره سمه ليکل شوې وي، د اړوندې ساحې (دسپلين) دوه ماهرينو ته د کتنو لپاره سپارل کېږي. په دې مرحله کې د ليکنې له کتونکو سره د ليکوال نوم نه شريکېږي (Blind Peer Review).

۴. تر لاسه شوې کتنې د مجلې له خوا ليکوال سره شريکېږي، ليکوال د ليکنې اصلاح شوې بڼه يو ځل بيا مجلې ته استوي.

۵. پر ليکنې د مجلې ايډېټر له خوا کره کتنه کېږي او په ليکنه کې اړينې سمونې په ګوته کېږي.

۶. د مجلې کتنپلاوي  له خوا د موضوع او د موضوع کيفيت ښه کولو په موخه کره کتنه کېږي او ليکنه ليکوال سره شريکېږي.

۷. د ليکوال له خوا تر اړينو اصلاحاتو وروسته د موضوع پروفي کتنه کېږي او د املايي/نحوي صحت په موخه ليکنه د ليکوال له خوا نهايي کېږي.

۸. د مجلې کتنپلاوی د ليکنو پروفي کتنه کوي او ليکنې تر نهايي کولو وروسته ډيزاين ته سپاري.

۹. د ليکنې ډېزاين تر سره کېږي او موضوع چاپ ته اماده کېږي.

۱۰. له چاپ وروسته د مجلې يوه کاپي ليکوال ته سپارل کېږي.